Vidhte paratë nga kasafortat e biznesve edhe banesave, në pranga  57-vjeçari 

Një 57-vjeçar, i dënuar më parë për vjedhje, është arrestuar për vjedhje të parave nga  kasafortat e bizneseve dhe të banesave.

Zbardhen 5 raste të vjedhjes së shumave të parave, të kryera nga ky shtetas, gjatë muajve të fundit.  

Sekuestrohen disa nga sendet e forta të cilat ky shtetas dyshohet se i përdorte për të hapur kasafortat. 

Shërbimet e Komisariatit të Policisë Nr. 2, në bashkëpunim me shërbimet e Komisariatit të Policisë Nr. 3, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, organizuan dhe finalizuan me sukses operacionin “Safe Box”, si rezultat i të cilit u vu në pranga shtetasi:

– R. H., 57 vjeç, për veprën penale “Vjedhja”, i dënuar më parë për të njëjtën veprimtari kriminale.

Nga veprimet hetimore dyshohet se ky shtetas:

-më datë 16.02.2025, ka vjedhur 1200 euro nga kasaforta e një biznesi në rrugën “Abdyl  Frashëri”;   

-më datë 02.02.2025, ka vjedhur 300 000 lekë nga kasaforta e një subjekti në rrugën “Reshit Çollaku”;  

-më datë 13.12.2024, ka vjedhur 370 800 lekë nga kasaforta e zyrës së një kompanie; 

-më datë 10.11.2024, ka vjedhur një shumë të konsiderueshme parash në një banesë në Rrugën e Dafinave;  

-më datë 19.09.2024, ka vjedhur një shumë parash në zyrat e një kompanie, në rrugën “Abdyl Frashëri”. 

Gjatë kontrollit në banesën e 57-vjeçarit, shëbimet e Policisë gjetën dhe sekuestruan disa nga sendet që ai dyshohet se ka përdorur për hapjen e kasafortave. 

Materialet procedurale i kaluan Prokurorisë, për veprime të mëtejshme.