Policia e Fierit ka finalizuar brenda 24 orëve dy operacione për goditjen e rasteve të armëmbajtjes pa leje në Fier dhe Mallakastër. Në pranga kanë rënë tre persona, ndërsa janë sekuestruar dy armë zjarri dhe një armë gjahu.
Në Fier është finalizuar operacioni i koduar “Aksi”, pas informacioneve operative se një person lëvizte i armatosur me armë zjarri në automjet.
Në Bypass-in e Fierit u arrestua 19-vjeçari M. M., banues në Vlorë. Gjatë kontrollit të automjetit që drejtonte, shërbimet e Policisë gjetën dhe sekuestruan një armë zjarri, tip pistoletë.
Në vijim të veprimeve hetimore, u arrestua edhe 28-vjeçari F. B., banues në Vlorë, i cili udhëtonte si pasagjer në automjet. Sipas Policisë, ai dyshohet se kishte dijeni se shoku i tij posedonte armën dhe synonte ta shiste në Fier.
Ndërkohë, në Mallakastër është finalizuar operacioni i koduar “Hidden Guns”, në kuadër të të cilit u arrestua në flagrancë 38-vjeçari I. S., banues në fshatin Lofkënd.
Sipas Policisë, 38-vjeçari dyshohet se, pas një konflikti për motive të dobëta, ka kanosur me armë gjahu një person tjetër.
Ndërhyrja e menjëhershme e shërbimeve të Policisë bëri të mundur neutralizimin e situatës dhe arrestimin e autorit të dyshuar.
Gjatë kontrollit në banesën e tij u gjetën dhe u sekuestruan një armë zjarri, tip kallashnikov, dhe një armë gjahu, të cilat dyshohet se i mbante pa leje.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
