Dy persona janë arrestuar nga policia e Gjirokastrës, pasi kanë thyer masën e sigurisë “arrest shtëpie” dhe dyshohen për veprën penale “Ndihma për kalim të paligjshëm të kufijve”.
Shtetasit A. O., 42 vjeç, banues në Sarandë, dhe A. M., 29 vjeç, banues në Shkodër, u kapën në aksin rrugor “GjirokastërTepelenë” duke drejtuar dy automjete të dyshuara për transportimin e emigrantëve të paligjshëm kundrejt pagesës. Gjatë kontrollit, policia gjeti dy radio-marrëse si ato të Policisë dhe një palë targa.
Operacioni, i koduar “Masa”, u organizua nga Seksioni për Hetimin e Trafiqeve të Paligjshme, në bashkëpunim me Sektorin Operacional, bazuar në informacionet e siguruara në rrugë operative.
Nga verifikimet rezultoi se të dy shtetasit kishin thyer masën e sigurisë së dhënë nga gjykatat përkatëse: 42-vjeçarit nga Gjykata e Sarandës dhe 29-vjeçarit nga Gjykata e Shkodrës.
Si rezultat i veprimeve të policisë, u arrestuan A. O. alias A. P. dhe A. M.
Janë sekuestruar dy automjete, dy radio-marrëse, një palë targa dhe katër celularë. Hetimet vijojnë për dokumentimin e veprimtarive të tyre të paligjshme.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
