Shqipëria dhe Maqedonia e Veriut kanë arritur një marrëveshje ndërkufitare për të lehtësuar lëvizjen e qytetarëve dhe të mallrave mes dy vendeve.
Marrëveshja "One Stop" parashikon kryerjen e kontrolleve kufitare në një pikë të vetme, duke eliminuar nevojën për ndalesa të veçanta në secilën anë të kufirit.
Zbatimi i marrëveshjes do të nisë brenda këtij muaji në pikën kufitare të Qafë Thanës, ndërsa muajin e ardhshëm do të shtrihet edhe në pikën kufitare të Bllatës.
Marrëveshja u nënshkrua në Dibër nga ministri i Punëve të Brendshme i Shqipërisë, Besfort Lamallari, dhe ministri i Punëve të Brendshme i Maqedonisë së Veriut, Pançe Toshkovski.
Qëllimi i kësaj marrëveshjeje është modernizimi i procedurave kufitare, shkurtimi i kohës së pritjes, si dhe rritja e efikasitetit dhe sigurisë në një nga korridoret më të rëndësishme lidhëse mes dy vendeve.
Sipas të dhënave zyrtare, në pikën kufitare të Bllatës kalojnë mesatarisht rreth 4 600 qytetarë në ditë, ndërsa gjatë pesë muajve të fundit janë regjistruar rreth 300 mijë automjete.
Rritja e fluksit lidhet edhe me funksionimin e Rrugës së Arbrit.
Marrëveshja "One Stop" pritet të lehtësojë ndjeshëm qarkullimin e qytetarëve dhe transportin e mallrave, duke përmirësuar bashkëpunimin ndërkufitar mes Shqipërisë dhe Maqedonisë së Veriut.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
