Prokuroria e Elbasanit zbardh detaje për dy të arrestuarit në Elbasan për trafik armësh dhe falsifikim dokumentesh, Dhimitër Peqini dhe Artan Lila.
Sipas hetimeve, dy të arrestuarit merreshin me trafikimin e armëve drejt Maqedonisë së Veriut, ndërsa në të njëjtën kohë kryenin edhe falsifikimin e dokumenteve, përfshirë letërnjoftime, pasaporta dhe leje drejtimi shqiptare e të huaja.
Hetimet janë kryer me metoda speciale, përfshirë vëzhgime ambientale dhe veprime simuluese, të cilat kanë çuar në sekuestrimin e disa armëve dhe pajisjeve të përdorura për falsifikimin e dokumenteve.
Gjatë kontrolleve në banesat e Peqinit dhe Lilës, autoritetet kanë gjetur dhe sekuestruar armë zjarri, municione dhe pajisje të specializuara për prodhimin e dokumenteve të falsifikuara.
Më 4 mars 2025, Prokuroria e Elbasanit urdhëroi ndalimin e dy të dyshuarve dhe ka paraqitur në Gjykatë kërkesën për vleftësimin e ndalimit dhe caktimin e masës së sigurisë “Arrest në burg” për ta.
Hetimet vijojnë për të zbuluar bashkëpunëtorë të mundshëm dhe për të zbardhur të gjithë zinxhirin e aktivitetit kriminal.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
