557-vjetori i vdekjes së Skënderbeut/ MEPJ: Trashëgimia e tij, frymëzim për të përfaqësuar Shqipërinë në arenën ndërkombëtare

Sot shënohet 557-vjetori i vdekjes së Heroit tonë Kombëtar, Gjergj Kastrioti Skënderbeu (1405-17 janar 1468)

Skënderbeu, Hero Kombëtar i shqiptarëve, strateg dhe burrë shteti i madh, udhëhoqi luftën për liri e pavarësi kundër pushtimit osman, për bashkimin politiko- shtetëror të popullit shqiptar.

Me këtë rast, Ministria për Evropën dhe Punët e Jashtme përkujtoi trashëgiminë e tij, duke e cilësuar atë si një frymëzim të vazhdueshëm për përfaqësimin e Shqipërisë në arenën ndërkombëtare.

557 vjet nga ndarja nga jeta e Gjergj Kastriot Skënderbeut, heroit të kombit shqiptar, strategut dhe diplomatit të jashtëzakonshëm që ndërtoi ura komunikimi dhe aleanca me fuqitë e kohës, duke vendosur themelet e diplomacisë.

Sot, trashëgimia e tij na frymëzon të vazhdojmë misionin tonë për të përfaqësuar Shqipërinë evropiane sa më denjësisht në arenën ndërkombëtare.

Figura e Skënderbeut është jo vetëm një simbol i luftës dhe heroizmit, por gjithashtu përfaqëson një periudhë të tërë të historisë kombëtare të shqiptarëve, të cilët luftuan për më shumë se një shekull kundër pushtimit osman.