Gjykata e Shkodrës ka lënë në masë sigurie “arrest në burg” shtetasin Milkjor Gjoka, i dyshuar si bashkëpunëtor në vrasjen e shtetasit Ridvan Hyseni në fshatin Mushan të njësisë Dajç.
Për dy dëshmitarët që u arrestuan pas ngjarjes, Gjykata ka caktuar masën e sigurisë “Detyrim paraqitje”. Shtetasit Blerim Mlloja dhe Marjeta Gramshi u arrestuan nën akuzën e moskallësimit të krimit, pasi kishin qenë të pranishëm në vendin ku u ekzekutua 46-vjeçari Ridvan Hyseni.
Shtetasi Milkjor Gjoka deklaroi gjatë seancës gjyqësore se ai nuk ka asnjë lidhje me vrasjen e ndodhur duke mohuar akuzat ndaj tij. Gjoka është shprehur se ka qenë rastësisht në vendin e ngjarjes, në vendin e gabuar dhe në momentin e gabuar. Ai është shprehur se nuk ka bashkëpunuar në asnjë moment me vëllezërit Mehmedaj që dyshohen si autorë të vrasjes së Ridvan Hysenit ose i njohur edhe si Ridvan Ramazani. Ndërkohë Milkjor Gjoka nuk ka dhënë sqarime të mëtejshme rreth ngjarjes. Pala mbrojtëse kërkoi një masë më lehtësuese por gjykata vendosi “arrest me burg”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
