Vetëm tre ditë më parë dhe me tre firma propozuese, mazhoranca socialiste ka zyrtarizuar projektin e saj për të vendosur një kufi ligjor mes një boshllëku që Kushtetuesja nuk e Zgjidhi.
Gjithçka lidhet me kërkesën e kryeministri Edi Rama, nëse drejtësia në këtë rast prokuroria apo gjykata mund të pezullojnë një anëtar të kabinetit qeveritar.
Teksa Kushtetuesja u nda në 4 me 4 duke mos dhënë asnjë përgjigje shteruese për kërkesën e z.Rama, mazhoranca vendosi të prekë Kodin e Procedurës Penale.
Sipas dokumentit të siguruar nga emisioni ‘FactCheck” deputetët që kanë firmosur projektligjin që rrëzon pezullimin janë, Edi Rama, Kryeminsitër dhe deputet. Taulant Balla, kreu i grupit parlamentar socialist si dhe kreu i komisionit të ligjeve Ulsi Manja, ish ministër Drejtësie.
Çfarë propozohet të ndryshojë
Projektligji parashikon ndërhyrje në pikën 2 të nenit 242 të Kodit të Procedurës Penale. Aktualisht kjo dispozitë përcakton se masa e pezullimit nga detyra nuk zbatohet ndaj personave të zgjedhur sipas ligjit elektoral.
Me ndryshimin e propozuar, në këtë listë do të shtohen edhe funksionet më të larta kushtetuese të shtetit, konkretisht:
Presidenti i Republikës, Avokati i Popullit, Kryeministri, Zëvendëskryeministri dhe ministrat, Anëtarët e Gjykatës Kushtetuese, Kryetari i Kontrollit të Lartë të Shtetit.
Ndaj këtyre funksioneve nuk do të mund të vendoset masa ndaluese e pezullimit nga detyra gjatë hetimit apo procesit penal.
Pse thotë mazhoranca se është i nevojshëm ndryshimi?
Në relacionin shoqërues siguruar nga “FactCheck”, Rama, Balla dhe Manja argumentojnë se qëllimi i ndërhyrjes është garantimi i funksionimit normal dhe të pandërprerë të institucioneve më të larta kushtetuese të shtetit.
Sipas tyre, pezullimi nga detyra i këtyre funksioneve gjatë procesit penal mund të cenojë ushtrimin e kompetencave kushtetuese dhe balancën ndërmjet pushteteve. Ndryshimi synon të vendosë një ekuilibër midis:ushtrimit të funksioneve kushtetuese dhe garantimit të rendit juridik e procesit penal.
Mazhoranca thekson se ndërhyrja nuk zgjeron imunitetin dhe nuk krijon paprekshmëri penale, pasi funksionarët e përfshirë mbeten plotësisht të hetueshëm dhe të gjykueshëm.
Po ashtu argumentohet se masa e pezullimit nga detyra ka karakter funksional dhe jo kufizues të lirisë personale, ndaj për funksione kushtetuese të nivelit të lartë duhet një trajtim procedural i diferencuar, për të mos penguar ushtrimin e tyre.
Çfarë është masa e pezullimit nga detyra
Kodi i Procedurës Penale dallon mes:
masave shtrënguese (si arresti, ndalimi i daljes jashtë shtetit etj.), që kufizojnë lirinë fizike
masave ndaluese, si pezullimi nga detyra, që kufizojnë ushtrimin e një funksioni publik
Ndryshimi i propozuar prek vetëm masën ndaluese të pezullimit nga detyra dhe nuk ndryshon rregullat për masat e sigurimit personal apo kompetencat e gjykatës.
Si është sot neni 242 i Kodit të Procedurës Penale
Në legjislacionin aktual, pika 2 e nenit 242 parashikon se masa e pezullimit nga detyra nuk zbatohet ndaj personave të zgjedhur sipas ligjit elektoral.
Pra aktualisht përjashtimi lidhet me mandatin zgjedhor, ndërsa me ndryshimin e propozuar përjashtimi do të shtrihet edhe tek funksionet sipas këtij projektligji.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
