Finalizohet një tjetër fazë e operacionit policor të koduar “The Wanted”, në kuadër të të cilit është vënë në pranga një 26-vjeçar i shpallur në kërkim ndërkombëtar, i dyshuar për kultivim të një sasie të konsiderueshme bimësh narkotike.
Sipas autoriteteve, i riu akuzohet për kultivimin e 10 900 bimëve të dyshuara Cannabis Sativa dhe përfshirje në veprimtari kriminale të organizuar. Ai pritet të ekstradohet nga Spanja drejt Shqipërisë, pas finalizimit të procedurave përkatëse.
Gjykata e Shkallës së Parë të Juridiksionit të Përgjithshëm Shkodër i kishte caktuar më herët masën e sigurisë “Arrest në burg” për veprat penale “Kultivimi i bimëve narkotike”, “Prodhimi dhe shitja e narkotikëve”, “Grupi i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”.
Nga hetimet rezulton se gjatë vitit 2023, në fshatin Kir të Njësisë Administrative Pult, si dhe në zona të tjera pranë Thethit, në territorin e Shkodrës, i dyshuari në bashkëpunim me anëtarë të një grupi të strukturuar kriminal ka kultivuar bimët narkotike.
Operacioni u realizua falë shkëmbimit të informacionit dhe koordinimit ndërmjet Interpol Tiranës dhe Interpol Madridit, që mundësoi lokalizimin, kapjen dhe ekstradimin e tij drejt Shqipërisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
