Policia e Korçës goditi një rast të transportimit të emigrantëve nga Vendet e Treta duke arrestuar një 44 vjeçar dhe shpallur në kërkim një 26 vjeçar.
Specialistët për Hetimin e Trafiqeve të Paligjshme dhe Narkotikëve, në bazë të informacioneve të siguruara nga inteligjenca policore, për një rast të transportimit të emigrantëve nga vendet e treta, kanë organizuar dhe finalizuar operacionin policor të koduar "Midnight 27".
Në kuadër të operacionit u arrestua shtetasi Emiljano Peshku, 44 vjeç, banues në fshatin Bitinckë, Devoll, dhe u shpall në kërkim shtetasi Xh. S., 26 vjeç, banues në Korçë.
Gjatë natës, në dalje të Pogradecit, i është bërë shenjë për ndalim, automjetit që drejtonte 44-vjeçari. Ai nuk i është bindur urdhrit, por ka vazhduar lëvizjen.
Menjëherë, shërbimet e Policisë i janë vënë në ndjekje, kanë bërë ndalimin e automjetit, në fshatin Qukës, Librazhd, dhe kanë arrestuar shtetasin Emiljano Peshku, ndërsa shtetasi Xh. S. (pasagjer në këtë automjet), duke përfituar nga errësira, është larguar. Vijon puna për kapjen e tij.
Në automjetin tip “BMW” që drejtonte i arrestuari, ishin 5 emigrantë nga vendet e treta, të cilët po transportoheshin kundrejt pagesave, nga 2 shtetasit, për të kaluar ilegalisht, kufirin, me destinacion vendet e BE-së.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
