Tensione në kantierin e Aeroportit të Vlorës, përplasje mes dy firmave që operojnë në projekt (VIDEO)

Përplasje dhe tensione janë regjistruar këtë të hënë në kantierin e punimeve të Aeroportit të Vlorës, mes dy firmave që operojnë në projekt. 

Sipas informacioneve paraprake, konflikti ka ndodhur mes firmës së Valon Ademit dhe asaj të biznesmenit Behgjet Pacolli.

Burime nga vendngjarja bëjnë me dije se njëra palë nuk ka lejuar hyrjen e punëtorëve në ambientet e kantierit, ndërsa pala tjetër ka kundërshtuar daljen e punëtorëve që ndodheshin brenda. 

Situata ka sjellë tensione dhe debate mes përfaqësuesve të firmave dhe punonjësve.

Në vendngjarje kanë mbërritur forca të Policisë së Shtetit dhe efektivë të Policisë së Vlorës, me qëllim qetësimin e situatës dhe shmangien e përshkallëzimit të konfliktit.

Deri më tani nuk raportohet për persona të lënduar, ndërsa pritet një reagim zyrtar lidhur me shkaqet e përplasjes dhe rrethanat që çuan në tensionet mes palëve.