Djegia e mjeteve të Deizi Arapit dhe Marsel Buçit, pezullohet për tri ditë shefi i Krimeve në Devoll

Është pezulluar shefi i krimeve në komisariatin e Devollit, ndërkohë që nisin hetimet për veprën kryerja e veprimeve arbitrare.

Sipas informacioneve, mësohet se mbrëmjen e djeshme janë shoqëruar në komisariat shtetasja Deizi Arapi dhe shtetasi Marsel Buçi, të përfshirë në konflikt për djegien e makinës së këtij të fundit.

Gjatë konfliktit në komisariat mes palëve, familjarët e Marselit kanë telefonuar deputetin Bledjon Nallbati i cili ka qenë prezent në ambientet e jashtme të komisariatit për tu interesuar për ngjarjen.

Sipas burimeve nga policia, Marsel Buçi pretendon se shefi i krimeve e ka goditur në zyrë, ndërsa është bërë ankesë pranë AMP-së e cila po bën hetime lidhur me këtë rast.

Mësohet se shefi i krimeve është pezulluar për 3 ditë deri sa të vendoset përfundimisht nga hetimet nëse do të ketë shkelje të tij apo do të rikthehet në punë.

Kujtojmë se djegia e mjetit Volsvagen në pronësi të 34-vjeçarit nga Bilishti, lidhet me ngjarjen e ndodhur dy javë më parë po në të njëjtën lagje ku u dogj mjeti në pronësi të Deizi Arapit.

E reja akuzoi në një dalje për mediat Marsel Buçin për ngjarjen duke e etiketuar si “punonjësi i karburantit të Nallbatit (deputetit të PD, Bledion Nallbati)”, por pa përmendur emrin e tij, gjë që e kishte dhënë gjatë deklaratës së saj në komisariat.