Sërish përmbytje në rrugët urbane/ Simoni: Situatë e njëjtë në Lezhë, shkak sistemi i amortizuar i kanalizimeve (VIDEO)

Reshjet e dendura të shiut që kanë përfshirë Lezhën gjatë mesnatës kanë krijuar sërish probleme në zonat urbane të qytetit. 

Korrespondenti i “MCN Live”, Juli Simoni, raporton se sistemi i kanalizimeve ka dështuar sërish të përballojë prurjet e mëdha, duke sjellë prezencë uji në bllokun e banimit “11 Janari” në lagjes “Besëlidhja”.

Reshjet e dendura të shiut që kanë përfshirë Lezhën prej mesnatës kanë shkaktuar probleme të shumta, kryesisht në zonat urbane. Sistemi i kanalizimeve nuk ka arritur të përballojë sasinë e madhe të prurjeve, duke sjellë përmbytje në bllokun e banimit “11 Janari” në lagjen “Besëlidhja”.

Kjo zonë përballet me të njëjtat probleme sa herë që ka reshje intensive, për shkak të infrastrukturës së amortizuar të kanalizimeve. 

Në Lezhë ka nisur puna për investimin në sistemin e ujërave të bardha dhe të zeza, me synimin për t’i dhënë zgjidhje situatës së përsëritur të përmbytjeve.

Megjithatë, reshjet e fundit kanë shkaktuar përmbytje të konsiderueshme. Niveli i ujit ka arritur deri në 40 centimetra, duke bllokuar hyrjet e pallateve dhe vështirësuar ndjeshëm qarkullimin e këmbësorëve dhe automjeteve. Probleme janë raportuar edhe në disa segmente të aksit Lezhë–Shëngjin.

Procesi mësimor ka vijuar normalisht në shkollën 9-vjeçare “Kosova”, pa pasur vështirësi të raportuara.

Përveç përmbytjeve, në pjesën më të madhe të territorit ka pasur edhe mungesë energjie elektrike për shkak të motit të keq. Ekipet përkatëse ndodhen në terren dhe po punojnë për normalizimin e situatës.