Tre skuadrat shqiptare, të përbëra nga 85 trupa, mes të cilëve efektivë të Forcave të Armatosura, Emergjencave Civile dhe ekipeve shëndetësore, e kanë përmbyllur misionin e tyre në Turqi, në ndihmë të personave të prekur nga tërmeti i 6 shkurtit.
Pas 11 ditësh pune intensive, ata janë përcjellë nga homologët turq, por edhe qytetarët e thjeshtë, duke u falënderuar për shërbimin, ka bërë të ditur ministri i Mbrojtjes, Niko Peleshi.
Krenari dhe mirënjohje pafund për 3 ekipet e vajzave dhe djemve nga Forcat e Armatosura, Emergjencat Civile dhe ekipet shëndetësore që kontribuuan përgjatë 11 ditëve në operacionet e kërkim-shpëtimit në zonat e shkatërruara nga dy tërmetet e fuqishme në Turqi.
Ata u nisën për t’u kthyer në Atdhe, duke marrë me vete edhe respektin e popullit turk, që njëherësh është vlerësim për Shqipërinë tonë. Të gatshëm dhe solidarë sa herë të jetë nevoja për kontributin tonë!
Ekipet shqiptare kanë qenë të vendosura kryesisht në zonën e Malatayas, në koordinim edhe me emergjencat turke, për të maksimizuar mundësinë e suksesit të operacioneve.
Po ashtu, një shumë paraprake prej 1 milion dollarësh, është dhënë nga Shqipëria si donacion për Turqinë, e cila pret edhe një konferencë donatorësh të mbajtur nga vendet e Bashkimit Evropian, për të mbledhur të tjera fonde për rindërtimit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
