Nisin sot seancat publike me subjektet e vlerësimit kalimtar në kuadër të procesit të vetingut për pjesëtarët e Policisë së Shtetit.
Ministri i Brendshëm, Taulant Balla u shpreh sot se vetingu i funksioneve drejtuese në Policinë e Shtetit është një mekanizëm i domosdoshëm vlerësimi.
Procesi i vetëpastrimit të Policisë së Shtetit lidhet ngushtësisht me garantimin e integritetit të drejtuesve të Policisë.
Për këtë qëllim, do të vijojë vetingu i funksioneve drejtuese në Policinë e Shtetit si një mekanizëm i domosdoshëm vlerësimi, i cili rrit besueshmërinë e drejtuesve brenda organizatës, por edhe forcon besimin e qytetarëve.
Ndërkohë në ditën e parë të procesit të Vetingut, drejtuesi i Drejtorisë Vendore të Policisë së Shkodrës, Edmond Sulaj ka kaluar me sukses procesin e vetingut dhe ka marrë konfirmimin për të vazhduar karrierën dhe detyrën në Policinë e Shtetit.
Zyrtari i lartë i kësaj organizate, është kontrolluar në 3 shtylla: pasuri, aftësi profesionale dhe pastërti figure. Pas analizës së të dhënave, rezultoi se Sula i plotëson kriteret.
Edmond Sulaj është emëruar në krye të Policisë së Shkodrës dy muaj më parë, duke zëvendësuar në këtë post kolegun tjetër Ervin Hodaj.
Procesi i rivlerësimit të figurës së kreut të Policisë së Shkodrës u zhvillua nga Agjencia e Mbikëqyrjes Policore, me trupën e vlerësimit Arben Sefaj kryesues, Denisa Sina relatore dhe Suela Bulku anëtare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
