Gjykata e Posaçme kundër Korrupsionit dhe Krimit të Organizuar (GJKKO), nuk e ka pranuar sot kërkesën e Prokurorisë së Posaçme (SPAK) për gjykim të ish-anëtarit të Gjykatës Kushtetuese, Fatos Lulo.
Lulo, akuzohet për fshehje dhe deklarim të rremë të pasurisë.
Në arsyetimin e GJKKO-së, thuhet se duhet rishqyrtuar edhe njëherë ekspertiza financiare e Fatos Lulos, ndryshe nga herët e tjera tanimë me një ekspert të pavarur.
Ndërkohë që si afat, Gjykata ka lënë datën 1 dhjetor.
Dy ish-anëtarët e Gjykatës Kushtetuese, Fatos Lulo dhe Bashkim Dedja, akuzohen për kryerjen e veprës penale “Refuzimi për deklarimin, mosdeklarimin, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Gjatë muajit prill, GJKKO sekuestroi pasuritë e ish-kryetarit të Gjykatës Kushtetuese, Bashkim Dedja, dhe ish-gjyqtarit Fatos Lulo.
SPAK nga hetimi penal zbuloi se ata kishin në pronësi pasuri të paluajtshme, të cilat nuk i justifikonin me burime të ligjshme, apo pasuri që i kishin fshehur.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
