Kontrollet e shtuara në pikat kufitare vijojnë të nxjerrin në pah tentativa për trafikim dhe shmangie të ligjit. Vetëm gjatë 12 orëve të fundit, Policia Kufitare në Muriqan ka zbuluar dy raste të rënda paligjshmërie, duke ndërhyrë me masa konkrete dhe duke çuar në sekuestrime dhe arrestime.
Shërbimet e Policisë Kufitare në Pikën e Kalimit Kufitar Muriqan kanë intensifikuar kontrollet gjatë kësaj periudhe, duke goditur raste që lidhen me trafikimin e lëndëve narkotike dhe mosdeklarimin e të hollave në kufi.
Si rezultat i kontrolleve të detajuara në hyrje dhe dalje të territorit shqiptar, autoritetet kanë sekuestruar rreth 4.2 kilogramë lëndë të dyshuar narkotike kanabis, si dhe 38 mijë euro të padeklaruara.
Në rastin e parë, specialistët për Hetimin e Krimeve të DVKM Shkodër kanë nisur procedim penal në gjendje të lirë për një shtetas polak, 49 vjeç, i identifikuar me inicialet W. C. Gjatë kontrollit në hyrje të vendit, atij iu gjetën 30 mijë euro në trup, ndërsa edhe 8 mijë euro të tjera në çantën e dorës, të cilat nuk i kishte deklaruar sipas ligjit.
Ndërkohë, në një tjetër operacion, specialistët e Seksionit për Hetimin e Narkotikëve arrestuan dy shtetas nga Tirana, të moshave 42 dhe 32 vjeç. Gjatë kontrollit në dalje, në automjetin me të cilin po udhëtonin, u zbuluan të fshehura 8 qese me kanabis, me peshë totale rreth 4.2 kilogramë.
Nga hetimet paraprake dyshohet se lënda narkotike ishte siguruar në Gjermani, ndërsa po tentohej të transportohej më tej.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për vijimin e veprimeve hetimore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
