Dhunoi bashkëpunëtorin/ Në kërkim 31-vjeçari, kishte vënë në dispozicion lokalin për përdorim droge

Policia e Tiranës njoftoi se ka arrestuar një 27-vjeçar dhe tre të tjerë i ka proceduar penalisht.

Gjithashtu është shpallur në kërkim një 31-vjeçar, i cili kanosi dhe ushtroi dhunë ndaj bashkëpunëtorit të tij, për dhënie pasurie si dhe kishte vënë në dispozicion lokalin e tij, për përdorim droge.

Në kuadër të këtij operacioni u arrestua në flagrancë shtetasi K. M., 27 vjeç, banues në Tiranë, si dhe u proceduan penalisht shtetasit A. Ll., 24 vjeç, E. R., 34 vjeç, E. C., 33 vjeç, të tre banues në Tiranë.

Gjithashtu, në kuadër të këtij operacioni u shpall në kërkim shtetasi, A. M., 31 vjeç, banues në Tiranë.

Nga verifikimet e kryera ka rezultuar se shtetasi A. M., së bashku me shtetasin A. Ll., administronin së bashku një lokal, në rrugën “Marie Kraja”, të cilin e kishin vendosur në dispozicion për përdorimin e lëndëve narkotike. Shtetasi A. M., kishte kanosur bashkëpunëtorin e tij, shtetasin A. Ll., e kishte dhunuar dhe e shtrëngonte për dhënie pasurie, pasi ky i fundit konsumonte lëndë narkotike dhe nuk kryente pagesën për të.

Në vijim të veprimeve u proceduan penalisht shtetasit E. R., dhe E. C., pasi kanë pasur dijeni për ngjarjen dhe nuk e kanë kallëzuar atë, në organet kompetente

Gjatë kontrollit të ushtruar në ambientet e këtij lokali, shtetasit K. M., iu gjetën një përforcues grushti (dorezë metalike), një sasi lënde e dyshuar narkotike e llojit cannabis sativa, të cilat u sekuestruan në cilësinë e provës materiale, së bashku me tre aparate celulare dhe mjete që shërbejnë për konsumim të lëndëve narkotike.

Po punohet për kapjen e shtetasit A. M.

Materialet i kaluan Prokurorisë, për veprime të mëtejshme procedurale.