Ka makina që kushtojnë miliona dhe ka makina që e ndryshojnë historinë e ankandeve përgjithmonë. Mercedes-Benz 300 SLR Uhlenhaut Coupe i përket kategorisë së dytë, pasi në maj 2022 u shit për 135 milionë euro, duke vendosur një nga rekordet më mbresëlënëse në historinë e automobilave.
Edhe pse shuma dihet deri në euron e fundit, personi që e ka “futur në xhep” këtë shumë astronomike nuk është zbuluar zyrtarisht. Një raportim i ri zbulon si pronar, miliarderin britanik Sir Jim Ratcliffe, themeluesin e INEOS. Megjithatë, ky është një vlerësim i bazuar në indikacione dhe jo në informacione të konfirmuara.
Shitja u zhvillua më 5 maj 2022, në Muzeun Mercedes-Benz në Stuttgart, Gjermani, në një aktivitet të mbyllur për koleksionistë të përzgjedhur. Procesi u organizua bashkërisht nga kompania gjermane dhe RM Sotheby’s. Çmimi përfundimtar arriti në 135 milionë euro.
Oferta u dorëzua nëpërmjet Simon Kidston, një ndërmjetës dhe konsulent i njohur në fushën e makinave të koleksionistëve, i cili përfaqësonte një blerës privat që zgjodhi të mbetej anonim.
Sipas raportimeve, Sir Jim Ratcliffe është një nga biznesmenët më të pasur të Britanisë, themelues i grupit industrial INEOS dhe një njeri me një prani të fortë në industrinë e automobilave.
INEOS ka krijuar markën e vet të automobilave me Grenadier, ndërsa Ratcliffe ka lidhje edhe me Formula 1, pasi me kompaninë e tij zotëron një pakicë aksionesh në ekipin Mercedes-AMG Petronas së bashku me Mercedes-Benz dhe Toto Wolff.
Këto lidhje, të kombinuara me ndikimin e tij financiar dhe interesin në automobila, kanë nxitur spekulime. Megjithatë, as Mercedes dhe as RM Sotheby’s nuk e kanë konfirmuar ende blerësin.
Vlera e 300 SLR Uhlenhaut Coupe nuk shpjegohet vetëm nga rrallësia e saj. Ajo u ndërtua në vitin 1955 dhe u bazua në teknologjinë e garave të Mercedes-Benz W 196 R, modelit me një vend në të cilin Juan Manuel Fangio fitoi dy tituj botërorë në Formula 1.
Nga shasitë e garave të zhvilluara për programin 300 SLR, vetëm dy prej tyre morën karrocerinë e mbyllur Coupe me dyert karakteristike që hapeshin lart. Të dy makinat u bënë të njohura si “E Kuqe” dhe “Blu”, sipas ngjyrës së brendshme të tyre.
Nën karroceri ndodhej një motor tre litërsh, tetë cilindrash në linjë me injeksion të drejtpërdrejtë, me një fuqi prej afërsisht 310 kuaj-fuqi. Për standardet e viteve 1950, performanca ishte mbresëlënëse me një shpejtësi maksimale prej 290 km/orë, duke e bërë atë një nga makinat rrugore më të shpejta të kohës.
Emri Uhlenhaut vjen nga Rudolf Uhlenhaut, inxhinieri që luajti një rol vendimtar në zhvillimin e tij. Njëra nga dy makinat u përdor prej tij si automjet kompanie, ndërsa tjetra u mbajt kryesisht si ekspozitë dhe për prezantime të veçanta.
Derisa të ketë konfirmim zyrtar, emri i personit që bleu Mercedes-Benzin më të shtrenjtë në botë mbetet i panjohur. Jim Ratcliffe është një nga personat që është lidhur me misterin, por për momentin identiteti i blerësit mbetet një nga sekretet më të ruajtura në botën e makinave të koleksionistëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
