Situata pranë Kuvendit të Kosovës është tensionuar pasi Policia ka përdorur gaz lotsjellës dhe topa uji për të shpërndarë protestuesit dhe për të mundësuar largimin e deputetëve. Si pasojë e përleshjeve, raportohet për persona të lënduar dhe të arrestuar.
Protestuesit, të cilët po qëndronin në mbështetje të ndryshimit të Ligjit për Dhomat e Specializuara, bllokuan daljet e parlamentit duke kërkuar votimin e këtij ligji edhe në lexim të dytë, pasi ai kaloi me sukses vetëm leximin e parë.
Ky bllokim erdhi pas dështimit të arritjes së një marrëveshjeje mes Kryeministrit Albin Kurti dhe kreut të PDK-së, Bedri Hamza. Sipas zyrtarëve të PDK-së, Kurti ka kushtëzuar votimin e ndryshimit të Ligjit për Specialen me votimin e presidentit të ri, proces ky që ka si afat të fundit datën 6 tetor.
Nga ana tjetër, Partia Demokratike e Kosovës (PDK) ka dënuar ashpër ndërhyrjen policore, duke e cilësuar dhunën si tërësisht joproporcionale dhe të papranueshme për një protestë që kishte 20 ditë që zhvillohej e qetë.
PDK-ja u bëri thirrje organeve shtetërore të ndalin menjëherë veprimet që cenojnë të drejtën e qytetarëve për revoltë dhe të mos i përdorin institucionet e sigurisë për qëllime politike.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
