Bashkimi Evropian ka shprehur shqetësim të thellë lidhur me votimin e mundshëm në Kuvendin e Kosovës të ndryshimeve në Ligjin për Dhomat e Specializuara, duke vlerësuar se ato mund të cenojnë obligimet ndërkombëtare të vendit dhe parimet themelore të sundimit të ligjit.
Në një reagim zyrtar në prag të seancës së nesërme parlamentare, Zyra e BE-së në Kosovë thekson se këto ndryshime të propozuara ngrenë dyshime serioze mbi kushtetutshmërinë e tyre, si dhe prekin drejtpërdrejt pavarësinë e gjyqësorit, mbrojtjen e viktimave e të dëshmitarëve, vazhdimësinë e të drejtave procedurale dhe llogaridhënien efektive.
“Që nga kthimi i ligjit në Kuvendin e Kosovës për rishqyrtim, jemi angazhuar aktivisht për t'ua përcjellë shqetësimet dhe pritshmëritë tona autoriteteve të Kosovës”, thuhet në deklaratën e Zyrës së BE-së.
Duke mos dhënë mbështetje për miratimin e këtyre amendamenteve, Bashkimi Evropian u bën thirrje institucioneve të Kosovës që të marrin parasysh vërejtjet e ngritura dhe të zhvillojnë konsultime paraprake në përputhje me detyrimet ndërkombëtare, përpara se të procedojnë me votimin e ligjit në Kuvend.
Komisionerja e Bashkimit Evropian për Zgjerim, Marta Kos, deklaroi të martën e kaluar gjatë prezantimit të raportit të progresit se miratimi i ndryshimeve ligjore për Gjykatën Speciale ka paraqitur pengesa në procesin e integrimit evropian të Kosovës.
Ajo potencoi se BE-ja është në bisedime me Qeverinë e Kosovës dhe pret që vendi t'i përmbushë obligimet e tij ndërkombëtare edhe sa i përket kësaj çështjeje.
Ndërkohë, Ligji për Dhomat e Specializuara hyri në rendin e ditës së seancës së sotme plenare me kërkesë të Grupit Parlamentar të Partisë Demokratike të Kosovës (PDK).
Gjatë seancës, ushtruesja e detyrës së kryetares së PDK-së, Vlora Çitaku, kërkoi mbështetjen e deputetëve të Kuvendit të Kosovës për të votuar rrëzimin e vetos së presidentes Justina Shiroka-Pula lidhur me këtë ligj.
Ajo u zotua se menjëherë të hënën partia e saj do të paraqesë një nismë të re ligjore për amendamentimin e ligjit brenda një afati dyjavor.
Megjithatë, meqenëse seanca e sotme u ndërpre dhe nuk vazhdoi më tej, shqyrtimi i pikave të mbetura të rendit të ditës, përfshirë edhe votimin për këtë ligj, është shtyrë për në seancën e nesërme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
