Ministri për Marrëdhënie ndërmjet Bashkësive i Maqedonisë së Veriut, Agon Ferati, ka zhvilluar një takim zyrtar në Tiranë me ministrin për Evropën dhe Punët e Jashtme të Shqipërisë, Ferit Hoxha.
Sipas zyrës së shtypit, në qendër të diskutimeve ishte avancimi i marrëdhënieve ndërshtetërore dhe përmirësimin e ndërlidhjes infrastrukturore, si faktorë kyç për zhvillimin ekonomik dhe afrimin e qytetarëve.
Gjatë bisedës, ministri Ferati prezantoi përpjekjet për krijimin e një klime të re midis komuniteteve etnike dhe luftimin e stereotipave që dëmtojnë rajonin.
Nga ana e tij, kryediplomati shqiptar, Ferit Hoxha, shprehu gatishmërinë për thellimin e bashkëpunimit dypalësh dhe theksoi nevojën për koordinim të ngushtë për projektin strategjik të Korridorit të Tetë.
Në këtë kuadër, u nënvizuan afatet konkrete të realizimit të infrastrukturës në pjesën shqiptare:
• Viti 2029: Afati i parashikuar për përfundimin e pjesës rrugore.
• Viti 2032: Afati i parashikuar për përfundimin e linjës hekurudhore.
Të dy ministrat vlerësuan gjithashtu rëndësinë e lehtësimeve shtesë kufitare për të forcuar lidhjet tregtare dhe mirëqenien e qytetarëve. Po ashtu, ata riafirmuan partneritetin euroatlantik dhe ndanë synimin e përbashkët për përshpejtimin e anëtarësimit të plotë në Bashkimin Evropian, si garanci për sundimin e ligjit dhe progresin rajonal.
Një vëmendje e veçantë iu kushtua edhe kohezionit social.
Ministri Ferati theksoi se, përtej kanaleve zyrtare ndërinstitucionale, është jetike zgjerimi i bashkëpunimit përmes organizatave të shoqërisë civile në të dyja vendet.
Takimi u përmbyll me vullnetin e përbashkët për t'i kthyer këto nisma në rezultate konkrete dhe të prekshme për qytetarët.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
