Bashkimi Evropian deklaroi të enjten se nuk do të lejojë më ndalime kombëtare të veçuara në mediat sociale nga shtetet anëtare përpara se të miratohet një ligj i harmonizuar në të gjithë bllokun.
Ky qëndrim u bë i qartë pasi Brukseli bllokoi zyrtarisht projekt-rregullat e paraqitura nga Austria, e cila synonte të ndalonte fëmijët nën 14 vjeç nga përdorimi i rrjeteve sociale.
Sipas legjislacionit të BE-së, shtetet anëtare janë të detyruara të njoftojnë Komisionin Evropian për çdo propozim ligjor, me qëllim që të sigurohet se ai nuk bie ndesh me rregullat e tregut të përbashkët.
“Komisioni ka vendosur të shtyjë për 12 muaj çdo projekt-ligj kombëtar që mbivendoset me rregullat e harmonizuara të ardhshme. Tani duhet të përqendrohemi në negociatat e Aktit të BE-së për Fëmijët dhe të sigurojmë një zbatim efektiv të rregullave tona”, deklaroi zëdhënësi i BE-së, Thomas Regnier.
Komisioni Evropian propozoi muajin e kaluar një draft ku kërkohet ndalimi i plotë i fëmijëve nën 13 vjeç nga mediat sociale, si dhe lejimi i një aksesi të kufizuar e të mbikëqyrur deri në moshën 15 vjeç.
Brukseli beson se nëse vendet lejohen të miratojnë ligje të pavarura kombëtare, kjo do të krijonte barriera dhe kufizime të ndryshme moshe brenda BE-së.
Gjithashtu, ekziston frika se shtetet anëtare nuk do të nxitonin për të miratuar ligjin e përbashkët evropian nëse do të kishin tashmë rregullat e tyre në fuqi. Komisioni shpreson që një marrëveshje përfundimtare me Parlamentin Evropian të arrihet në muajt e ardhshëm.
Vendimi i Brukselit ka ngjallur irritim të madh në Austri. Zëvendëskancelari austriak, Andreas Babler, u shpreh se nuk e kuptonte këtë bllokim nga ana e Komisionit.
“Vjena kishte për qëllim të mbronte fëmijët nga dëmi i përditshëm i shkaktuar nga kompanitë e mediave sociale dhe kjo nuk është diçka që mund të shtyhet”, deklaroi Babler, ndërsa qeveria austriake bëri presion që ligji i saj të hyjë në fuqi "menjëherë" pas përfundimit të afatit njëvjeçar të ngrirjes.
Megjithatë, ky vendim do të ketë disa përjashtime që mund ta zemërojnë edhe më shumë Vjenën. Franca dhe Greqia pritet t'i shpëtojnë këtij bllokimi të plotë.
Ndërkaq, zëdhënësi Regnier nuk pranoi të komentonte se cili do të jetë fati i ndalimeve të ngjashme që janë propozuar së fundmi nga shtetet e tjera anëtare, përfshirë Italinë dhe Sllovakinë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
