Specialistët për Hetimin e Krimeve në Komisariatin e Policisë Maliq kanë nisur një procedim penal në gjendje të lirë ndaj një 30-vjeçari, i cili akuzohet se ka kanosur babain e një gazetareje. Procedimi ndaj shtetasit A. K., banues në Maliq, nisi menjëherë pas kallëzimit të bërë në polici nga i dëmtuari, shtetasi R. R., 69 vjeç.
Sipas njoftimit zyrtar të Policisë së Shtetit, 30-vjeçari ka përdorur rrjetet sociale për të dërguar mesazhe kërcënuese në drejtim të 69-vjeçarit, i cili është babai i gazetares I. R.
Vetëm një ditë më parë në Korçë, gazetarja I. R., gjatë ushtrimit të profesionit të saj, u përfshi në një konflikt verbal me një deputet në përfundim të një aktiviteti elektoral. Ky sherr duket se është bërë shkak që 30-vjeçari të hakmerrej duke kërcënuar familjarin e gazetares.
Materialet procedurale për këtë ngjarje i janë referuar tashmë Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
