Çdo ditë pa institucione të reja e rrit koston e krizës politike në Kosovë. Vonesat në konstituimin e Kuvendit dhe formimin e Qeverisë rrezikojnë miliona euro fonde nga Bashkimi Evropian, pengojnë reformat dhe shtojnë pasigurinë për bizneset dhe investitorët.
Më shumë se një muaj pas zgjedhjeve parlamentare të 7 qershorit, partitë politike ende nuk kanë arritur një marrëveshje për krijimin e institucioneve të reja.
Në vend të sinjaleve për kompromis, zhvillimet e fundit kanë shtuar pasiguritë për afatet e konstituimit të Kuvendit dhe formimit të Qeverisë.
Shpresat për një marrëveshje mes Lëvizjes Vetëvendosje (LVV) dhe Lidhjes Demokratike të Kosovës (LDK) u zbehën më 15 korrik, pasi kryetari i LDK-së, Lumir Abdixhiku, njoftoi pezullimin e bisedimeve me LVV-në për shkak të zhvillimeve të brendshme në parti.
Një koalicion mes dy forcave politike shihej si alternativa më e mundshme për krijimin e institucioneve të reja.
Nga ana e saj, LVV deklaron se mbetet e hapur për marrëveshje me partitë shqiptare.
"Jemi aktivë dhe konstruktivë për takime e bashkëbisedime, të hapur dhe të sinqertë për një marrëveshje. Shpresojmë që opozita të mos e çojë vendin sërish në zgjedhje", ka deklaruar zëdhënësi i Qeverisë në detyrë, Arlind Manxhuka.
Ndërkohë, Sekretari i LDK-së, Ilir Ferati, tha se mbledhja e Kuvendit të jashtëzakonshëm të partisë është bërë urgjente për shkak të afateve kushtetuese, por nuk dha një datë konkrete. Afati për konstituimin e Kuvendit të Kosovës është 7 gushti.
Partia Demokratike e Kosovës ka bërë të ditur se do të mbetet në opozitë, ndërsa Aleanca për Ardhmërinë e Kosovës nuk i është përgjigjur ftesës së parë të Albin Kurtit për takim.
Lëvizja Vetëvendosje, së bashku me deputetët e pakicave joserbe që tradicionalisht mbështesin formimin e institucioneve, ka votat e nevojshme për konstituimin e Kuvendit dhe zgjedhjen e kryetarit të tij.
Megjithatë, sfida më e madhe mbetet zgjedhja e presidentit të Kosovës, proces që kërkon të paktën 80 vota në Kuvend, një shumicë që LVV nuk e disponon.
Nëse presidenti nuk zgjidhet brenda 60 ditëve nga konstituimi i Kuvendit, Kushtetuta parashikon mbajtjen automatike të zgjedhjeve të reja parlamentare.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
