14 organizata të shoqërisë civile në Kosovë i janë drejtuar Gjykatës Kushtetuese me kërkesë për të ndërmarrë veprime lidhur me zbatimin e aktgjykimit që përcakton afatin për konstituimin e Kuvendit të Kosovës.
Organizatat, të udhëhequra nga AVONET, kërkojnë nga Gjykata të vlerësojë nëse aktgjykimi i saj është zbatuar në përputhje me përcaktimet dhe afatet e përcaktuara prej tij, pas dështimit të Kuvendit për të përfunduar procesin e konstituimit brenda afatit.
Rezultatet përfundimtare të zgjedhjeve të 7 qershorit u certifikuan më 8 korrik, ndërsa afati 30-ditor për konstituimin e Kuvendit përfundoi më 7 gusht.
Seanca konstituive e Kuvendit nisi më 6 gusht, por nuk përfundoi me zgjedhjen e kryetarit dhe nënkryetarëve. Vazhdimi i saj ishte caktuar për 8 gusht, pra pas përfundimit të afatit 30-ditor.
Pikërisht për këtë arsye, AVONET dhe 13 organizatat e tjera kërkojnë që Gjykata Kushtetuese të shqyrtojë nëse aktgjykimi përkatës është zbatuar në mënyrë të rregullt.
“Qëllimi është të sigurohet qartësi juridike dhe institucionale lidhur me procesin e konstituimit të Kuvendit dhe respektimin e vendimeve të Gjykatës Kushtetuese”, thuhet në njoftimin e publikuar.
Kërkesa e organizatave vjen në një kohë kur Kosova vijon të jetë pa një Kuvend të konstituuar, më shumë se dy muaj pas zgjedhjeve të parakohshme parlamentare të 7 qershorit.
Seanca konstituive e Kuvendit nisi më 6 gusht, por procesi është shoqëruar me shtyrje dhe paqartësi lidhur me mënyrën se si do të vijojë konstituimi i plotë i institucionit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
