Kryeministri i Kosovës, Albin Kurti, u takua dje me kreun e Lidhja Demokratike e Kosovës (LDK), Lumir Abdixhiku, në përpjekje për të siguruar konsensusin e nevojshëm për zgjedhjen e presidentit të ri të vendit. Sipas afateve kushtetuese, kanë mbetur edhe 8 ditë kohë për propozimin e emrave.
Analisti Afrim Kasolli, në një intervistë për “MCN Live”, u shpreh se gjasat janë të mëdha që deri më 5 mars të mos ketë një zgjidhje nga subjektet politike.
Procesi mbetet i paqartë dhe nuk ka ende sinjale konkrete për një marrëveshje.
Kemi parë vetëm takime të iniciuara nga Kurti me dy liderët e partive opozitare, me Bedri Hamza dhe Lumir Abdixhikun, por edhe pas përfundimit të tyre nuk pati asnjë emër konkret për kandidat.
Kjo tregon se situata mbetet e paqartë dhe, pavarësisht përpjekjeve formale, gjasat janë të mëdha që të mos arrihet pajtimi mes subjekteve politike.
Nëse nuk gjendet një zgjidhje brenda afatit të mbetur, vendi rrezikon të shkojë në zgjedhje të jashtëzakonshme pas datës 5 mars.
Ndërkohë, sipas Kasollit, presidentja aktuale, Vjosa Osmani, nuk gëzon mbështetjen e asnjë partie politike për një rikandidim të mundshëm.
Megjithëse Osmani ka shprehur gatishmërinë për të vazhduar mandatin dhe ka vlerësuar rolin e saj në përmirësimin e imazhit të Kosovës në arenën ndërkombëtare, aktualisht nuk ka një mbështetje të qartë politike për këtë kandidaturë.
Pa një konsensus të shpejtë politik, vendi mund të përballet me një tjetër krizë institucionale në ditët në vijim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
