Drejt konstituimit të Kuvendit të Kosovës, deputetëve u dërgohen ftesat për seancën e 6 gushtit

Deputetët e zgjedhur të Kuvendit të Kosovës kanë marrë sot ftesat për seancën konstituive, e cila do të mbahet më 6 gusht, në orën 10:00.

Ftesat janë dërguar nga ushtruesja e detyrës së presidentes dhe ish-kryetarja e Kuvendit, Albulena Haxhiu. Bashkë me to është përcjellë edhe rendi i ditës së seancës.

Sipas rendit të ditës, fillimisht do të formohet Komisioni i përkohshëm për verifikimin e kuorumit dhe mandateve të deputetëve. Më pas do të bëhet betimi i deputetëve, ndërsa pika e tretë parashikon zgjedhjen e kryetarit të Kuvendit. Seanca do të përmbyllet me zgjedhjen e pesë nënkryetarëve të Kuvendit.

Seanca konstituive do të drejtohet nga deputeti më i vjetër dhe deputeti më i ri i legjislaturës.

Sipas Kushtetutës dhe Rregullores së Kuvendit, kandidatin për kryetar e propozon grupi më i madh parlamentar, ndërsa ai zgjidhet me shumicën e votave të të gjithë deputetëve, pra me të paktën 61 vota nga 120.

Pas zgjedhjes së kryetarit, deputetët do të votojnë edhe për pesë nënkryetarët e Kuvendit. 

Tre prej tyre propozohen nga tri grupet më të mëdha parlamentare, ndërsa dy të tjerët nga deputetët që përfaqësojnë komunitetet joshumicë.