Një incident i pazakontë ka ndodhur në Mitrovicën e Veriut, ku Policia e Kosovës ka ndaluar përkohësisht kryetarin e komunës, Milan Radojeviç, dhe kryesuesin e Kuvendit Komunal, Ivan Zaporozhac, pas një përplasjeje lidhur me mbishkrimin “I Love Mitrovica” në qendër të qytetit.
Sipas Policisë së Kosovës, dy zyrtarët lokalë janë shoqëruar në stacion policor për intervistim pasi dyshohet se kanë dëmtuar mbishkrimin duke u përpjekur të mbulojnë me ngjyrë të kuqe zemrën e gjelbër që është pjesë e tij.
Ngjarja ndodhi pasi Kuvendi Komunal i Mitrovicës së Veriut kishte miratuar më herët një vendim për largimin e mbishkrimit, vendim që kishte shkaktuar debate dhe tensione edhe gjatë mbledhjeve të kuvendit komunal.
Pamje të publikuara nga mediat lokale serbe “Kossev” tregojnë momentin kur, pas diskutimeve me efektivët e policisë, kryesuesi i Kuvendit Komunal ngjyros me të kuqe simbolin e zemrës në tabelën e vendosur në qendër të qytetit.
Policia ndërhyri menjëherë, duke i shoqëruar të dy zyrtarët për veprime të mëtejshme procedurale. Pas marrjes në pyetje, ata u lanë të lirë.
Sipas sqarimit zyrtar të Policisë së Kosovës, autoritetet komunale ishin njoftuar se zbatimi i vendimit për largimin e mbishkrimit duhej të pezullohej deri në shqyrtimin e tij nga Ministria e Administrimit të Pushtetit Lokal.
Pas lirimit, kryetari Milan Radojeviç deklaroi para mediave se pushteti lokal po vepronte në zbatim të vendimeve të miratuara nga institucionet komunale.
Mbishkrimi “I Love Mitrovica” ishte vendosur në tetor të vitit 2025, pas largimit të një mbishkrimi të mëparshëm në alfabetin cirilik.
Ai përfshin një zemër të gjelbër dhe stemën e re komunale, elemente që simbolizojnë identitetin e qytetit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
