Në Kosovë u mbajt seanca konstituive e Kuvendit, e thirrur një ditë më parë nga Presidentja Vjosa Osmani. Me këtë rast u bë konstituimi i legjislaturës së re, duke hapur rrugën për formimin e institucioneve të reja.
Kandidatja e Lëvizjes Vetëvendosje për kryetare të Kuvendit, Albulena Haxhiu, arriti të sigurojë 66 vota dhe u zgjodh në krye të këtij institucioni. Po ashtu, votëbesim morën edhe kandidatët e propozuar për nënkryetarë të Kuvendit.
Gjatë së njëjtës ditë, deputetët votuan mbrëmjen e së mërkurës edhe për qeverinë e re të Kosovës, me Albin Kurtin në postin e kryeministrit. Në fjalën e tij para Kuvendit, Kurti prezantoi përbërjen e kabinetit qeveritar dhe prioritetet e programit qeverisës.
Ai u ndal edhe te procesi gjyqësor në Hagë ndaj ish-drejtuesve të UÇK-së, duke e cilësuar si të padrejtë çdo përpjekje për t’i barazuar ata me regjimin e Sllobodan Millosheviçit.
Sipas tij, krimet kundër njerëzimit në Kosovë janë kryer nga regjimi serb, gjë që, siç theksoi, është e dokumentuar dhe e pranuar ndërkombëtarisht.
Kurti e quajti të papranueshëm barazimin mes ish-krerëve të UÇK-së dhe një regjimi që ai e cilësoi gjenocidal.
Pas miratimit të qeverisë, Albin Kurti bëri betimin si kryeministër i Kosovës, duke u zotuar se do ta ushtrojë detyrën me përkushtim dhe ndershmëri, do të respektojë Kushtetutën dhe ligjet e vendit, si dhe do të punojë për përparimin e Republikës së Kosovës.
Kësisoj Albin Kurti u rizgjodh Kryeministër i Kosovës nga parlamenti i Prishtinës pasi partia e tij Lëvizja Vetëvendosje fitoi zgjedhjet e parakohshme, duke i dhënë fund një viti ngërçi institucional.
Zgjedhjet parlamentare u mbajtën më 28 dhjetor, pasi Albin Kurti nuk arriti të siguronte shumicën pas zgjedhjeve të para në shkurt 2025.
Kurti më pas drejtoi një qeveri të përkohshme për dymbëdhjetë muaj.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
