Kriza presidenciale në Kosovë/ Haxhiu: Kurti po injoron opozitën, rrezikohet demokracia (VIDEO)

Ditën e djeshme, presidentja Vjosa Osmani i dorëzoi detyrën kryetares së Kuvendit, Albulena Haxhiu, pas përfundimit të mandatit të saj presidencial. 

Në një intervistë për studion e lajmeve në MCN TV, analisti Baton Haxhiu komentoi situatën politike në Kosovë, duke theksuar tensionet dhe sfidat për zgjedhjen e një presidenti konsensual deri më 28 prill.

Besoj se jo, për arsye se Albin Kurtit i konvenon kjo. Ai ka zgjedhur tashmë të zvarrisë procesin dhe sa më shumë ta shtyjë, aq më shumë përfiton nga diaspora në sezonin e verës. Ky model qeverisjeje tregon se Kurti bën strategjinë e tij duke injoruar totalisht opozitën, e cila është e paaftë në këtë situatë. Kjo politikë po krijon varfëri dhe heshtja që ajo gjeneron po fuqizon dominimin politik të Kurtit.

Për pyetjen nëse opozita ka interes të bllokojë zgjedhjen e presidentit, analisti shtoi:

Opozita do të donte të shkohej menjëherë në zgjedhje për të zgjedhur presidentin më herët. Por në këtë situatë, i konvenon një njeriu që ka pushtetin në dorë, si Albin Kurti, i cili udhëheq politikën pa pengesa.Opozita është shumë e dobët, ndërsa Kurti shumë i fortë. Nëse lirohen të burgosurit në Hagë, mund të krijohet një frymë e re, përndryshe Vetëvendosja do të vazhdojë të dominojë.

Në lidhje me pritshmëritë nga një mundësi e re zgjedhjesh, Haxhiu tha: “LVV ka arritur maksimumin, por del sërish e para. Nëse vazhdohet me këtë model, nuk dihet kur do të fillojë një qeverisje e plotë. LVV kërkon dominim të ngjashëm me modele si Edi Rama, Gruevski apo Vuçiç. Demokracia po bëhet gjithnjë e më e rrezikuar.”

Në një koment mbi situatën politike në Shqipëri dhe akuzat e kryeministrit Edi Rama ndaj opozitës, Haxhiu tha se: “Shqipëria ka një konflikt politik të pafund. Njëra palë ka përjetuar gjithçka në politikë, ka ndërtuar PD-në dhe tani po e varros atë. Kjo po dëmton vendin, por përgjegjësia nuk duhet kërkuar vetëm te kjo palë.”