Ish-shefi i Agjencia Kosovare për Inteligjencë (AKI), Driton Gashi, është dënuar edhe në rigjykim me 4 vjet e 8 muaj burgim për rastin e njohur si “Gylenistët”.
Gjykata Themelore në Prishtinë e shpalli sërish fajtor Gashin, i cili akuzohej se, në cilësinë e shefit të AKI-së, ishte angazhuar drejtpërdrejt në dëbimin e gjashtë shtetasve turq nga Kosova, duke shkelur procedurat ligjore.
Aktgjykimi u shpall të martën nga kryetarja e trupit gjykues, Violeta Namani-Hajra, së bashku me anëtarët Medie Bytyqi dhe Leon Përlaska.
Sipas vendimit të gjykatës, përveç dënimit me 4 vjet e 8 muaj burgim, ndaj Gashit është shqiptuar edhe dënim plotësues: ndalimi i ushtrimit të funksioneve në administratën publike për një periudhë prej katër vitesh pas përfundimit të vuajtjes së dënimit me burgim.
Rasti “Gylenistët” lidhet me dëbimin e gjashtë shtetasve turq në vitin 2018, ngjarje që pati shkaktuar reagime të shumta politike dhe institucionale në Kosovë.
Më 19 korrik 2023, Themelorja e kishte shpallur fajtor ish-shefin e AKI-së, Driton Gashi, duke e dënuar me 4 vite e 8 muaj burgim, derisa Valon Krasniqi dhe Rrahman Sylemani ishin liruar nga akuza.
Por, në dhjetor 2024, Gjykata e Apelit e ka kthyer këtë rast në rigjykim vetëm sa i përket pikës I të dispozitivit ndaj të akuzuarit Driton Gashi, ndërsa ka vërtetuar lirimin nga akuza për dy të akuzuarit tjerë.
Sipas aktakuzës së ngritur nga Prokuroria Speciale e Republikës së Kosovës më 24 shkurt 2021, Driton Gashi akuzohej se si person zyrtar në kohën e kryerjes së veprës penale drejtor i Përgjithshëm i Agjencisë Kosovare të Inteligjencës, tutje AKI, prej 23 mars 2018, e deri më 29 mars 2018, në Prishtinë, me qëllim që shtetasit e Republikës së Turqisë, Cihan Ozkan, Yusuf Karabina, Kahraman Demirez, Hasan Hyseyn Demir dhe Mustafa Erden, që kishin leje qëndrim të ligjshëm dhe të drejtën e punës në Kosovë dhe Osman Karakoya që kishte bërë kërkesë për leje qëndrim në Kosovë, e të cilit procedura nuk i kishte përfunduar, t’i dëbojë me forcë kundërligjshëm nga Kosova dhe t’i dorëzojë tek autoriteteve turke.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
