Shtetet e Bashkuara pritet të bëjnë ndryshime në kontributin e tyre në misionin e NATO-s në Kosovë, KFOR, në kuadër të një procesi më të gjerë të rishikimit të pranisë ushtarake të Aleancës në vend.
Një zyrtar i Komandës Evropiane të Shteteve të Bashkuara (EUCOM) tha për Radion Evropa e Lirë se vendimi bazohet në rishikimin vjetor të kryer nga Komanda Supreme e Forcave Aleate në Evropë (SHAPE), e cila ka rekomanduar përshtatjen e pranisë së trupave në terren.
“Bazuar në rishikimin më të fundit vjetor të Komandës Supreme të Forcave Aleate në Evropë, NATO-ja do të optimizojë pozicionimin e Forcës së Kosovës (KFOR). Si rezultat, Komanda Evropiane e SHBA-së do të bëjë një përshtatje, në faza dhe të bazuar në vlerësimin e rrezikut, të kontributit amerikan në KFOR, në përputhje me këtë rishikim të udhëhequr nga SHAPE”, tha zyrtari i EUCOM-it për Radion Evropa e Lirë.
Ai shtoi se SHBA-ja vazhdon ta konsiderojë misionin e KFOR-it një komponent kyç për ruajtjen e stabilitetit rajonal në Ballkanin Perëndimor, pa dhënë detaje mbi natyrën apo përmasat e ndryshimeve të mundshme.
Javën e kaluar, NATO njoftoi se do ta zvogëlojë gradualisht praninë e saj në Kosovë gjatë vitit të ardhshëm, duke argumentuar se situata e sigurisë ka shënuar përmirësime.
Aktualisht, Shtetet e Bashkuara kanë rreth 590 ushtarë të dislokuar në kuadër të KFOR-it në Kosovë, një numër dukshëm më i ulët krahasuar me mbi 5 mijë trupa të vendosura në vitin 1999, kur misioni u krijua pas përfundimit të luftës.
SHBA-ja mban gjithashtu kampin ushtarak Bondsteel pranë Ferizajt, i konsideruar si baza më e madhe ushtarake amerikane në Ballkan.
KFOR-i aktualisht përbëhet nga më shumë se 4.600 trupa nga 31 vende pjesëmarrëse.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
