Presidenti i Shteteve të Bashkuara të Amerikës, Donald Trump, ka uruar Kosovën me rastin e 18-vjetorit të Pavarësisë.
Në një letër drejtuar presidentes Vjosa Osmani, Trump thekson se SHBA-ja mbetet e palëkundur në mbështetjen e sovranitetit dhe integritetit territorial të Kosovës.
Shtetet e Bashkuara mbeten të palëkundura në mbështetjen e tyre për sovranitetin dhe integritetin territorial të Kosovës. Ndërsa marrëdhëniet tona vazhdojnë të thellohen, ne presim me padurim ta zgjerojmë partneritetin tonë, përfshirë përmes rritjes së tregtisë dhe investimeve që nxisin prosperitetin e përbashkët.
Më tej, në letër theksohet se Shtetet e Bashkuara janë të gatshme të punojnë krah për krah me Kosovën për të avancuar paqen dhe stabilitetin, në dobi të të dyja vendeve.
Në mesazh është përmendur edhe mirëpritja e Kosovës si anëtare themeluese e Bordit të Paqes.
“Dua t’ju falënderoj ju dhe të gjithë kosovarët për mbështetjen tuaj të vazhdueshme ndaj përpjekjeve të Shteteve të Bashkuara për të zgjidhur sfidat globale në Ukrainë, Gaza dhe gjetkë. Gjithashtu e mirëpres Kosovën si një anëtare themeluese të Bordit të Paqes, i cili synon ta bëjë botën më të sigurt, më të fortë dhe më prosperuese”, thuhet në letrën e Trumpit.
Në fund të letrës, Presidenti amerikan ka shprehur besimin se bashkëpunimi dhe partneriteti ndërmjet dy shteteve do të forcohen edhe më tej në të ardhmen.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
