Dje në Hagë u mbajt seanca e fundit e deklaratave përmbyllëse në rastin kundër ish-presidentit të Kosovës, Hashim Thaçi, ish-kryeparlamentarëve Kadri Veseli dhe Jakup Krasniqi, si dhe ish-deputetit Rexhep Selimi. Të gjithë të akuzuarit kërkuan pafajësi gjatë procedurës.
Lidhur me këtë çështje, eksperti i sigurisë, Milaim Gashi, në një lidhje Skype me MCN Live theksoi se e gjithë politika është e organizuar në mbrojtje të ish krerëve dhe se dënimi për ta duhet të jetë minimal.
Shihet qartë që Thaçi dhe të tjerët janë përballur me akuza të rënda, por i gjithë opinioni publik dhe struktura politike në Kosovë janë mobilizuar për të mbrojtur ushtarët e UÇK-së, pasi ata kanë luftuar për vendin dhe jo në territore të Serbisë. Gabimi i vetëm i tribunalit është që ka futur në dyshim të gjithë të akuzuarit. Prandaj, lidhur me elementin e dënimit, mund të presim një dënim minimal kur të nisë gjykimi i dytë për Thaçin.
Gashi gjithashtu komentoi rolin e Shqipërisë në këtë proces:
Qeveria shqiptare ka luajtur me dy karta sa i përket mbrojtjes së të akuzuarve. Nëse Thaçi do të ishte më i organizuar, ky element nuk do të kishte ndodhur. Të akuzuarit kanë luajtur një rol historik në luftën kundër Milosheviçit, dhe për këtë arsye mbështetja për lirimin e mundshëm është e kuptueshme.
Eksperti nënvizoi se pjesa më e madhe e dëshmitarëve nuk lidhet direkt me krimet për të cilat akuzohen, duke hapur mundësinë që gjykimi i ardhshëm të përmbyllet me një dënim minimal.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
