Qeveria e Kosovës ka miratuar sot formimin e një grupi punues ndërinstitucional, i cili do të jetë përgjegjës për hartimin dhe bashkërendimin e një strategjie shtetërore lidhur me procedurat e Apelit në Dhomat e Specializuara të Hagës për katërshen e ish-krerëve të UÇK-së.
Gjatë hapjes së mbledhjes së qeverisë, kryeministri Albin Kurti e cilësoi këtë si një vendim tejet të rëndësishëm, duke ritheksuar qëndrimin e tij se aktgjykimi i shkallës së parë, që dënoi ish-udhëheqësit me 81 vite burgim, është i padrejtë moralisht dhe juridikisht.
Ai njoftoi se ky grup i posaçëm do të kryesohet nga zëvendëskryeministri Glauk Konjufca dhe do të ketë një përbërje të gjerë institucionale dhe parlamentare, duke tejkaluar dallimet partiake.
“Për këtë nevojitet një strategji shtetërore e kombëtare. Në Apel na duhet suksesi. Me këtë vendim po e konkretizojmë zotimin tonë që, me mjetet që kemi në dispozicion, të angazhohemi për drejtësi dhe për mbrojtjen e historisë së luftës së UÇK-së”, deklaroi Kurti.
Përveç vendimit për Gjykatën Speciale, kryeministri u ndal edhe te zhvillimet e fundit politike në vend.
Ai përshëndeti zgjedhjen e presidentes së shtatë të Republikës së Kosovës gjatë javës së kaluar, duke nënvizuar se ky hap shënon përmbylljen e plotë të konstituimit të institucioneve shtetërore pas një periudhe të gjatë bllokadash.
Sipas Kurtit, vendi po i jep fund një cikli të gjatë fushatave të njëpasnjëshme elektorale dhe ngatërresave institucionale që nisën që prej janarit të vitit 2025.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
