Ministri në detyrë i Mjedisit, Planifikimit Hapësinor dhe Infrastrukturës, Liburn Aliu, ka dhënë dorëheqje sot nga posti i tij, një ditë pas zgjedhjes së Dimal Bashës si kryetar i Kuvendit të Kosovës.
Në një deklaratë publike, Aliu tha se vendimi i tij për dorëheqje lidhet drejtpërdrejt me zgjedhjen e Bashës në krye të Kuvendit, duke e konsideruar këtë vendim si të papërputhshëm me idealet për të cilat ai është angazhuar politikisht.
Dua t’ju njoftoj që sapo e dorëzova te Kryeministri i Republikës së Kosovës, z. Albin Kurti, letrën e dorëheqjes sime nga detyra e ministrit.
Dorëheqja ime vjen pas zgjedhjes së djeshme të kryetarit të Kuvendit të Republikës së Kosovës.
Dje, pas votimit, e kam njoftuar Kryeministrin Kurti për vendimin tim.
Aliu ka shtuar se zgjedhja e djeshme e Kryetarit të Kuvendit, institucionit më të lartë, ku vendosen ligjet dhe jep llogari qeveria, nuk është në frymën e në lartësinë e atij ideali për Republikën që ka qenë dhe mbetet arsye angazhimi për të.
Dimal Basha, i cili u zgjodh me 73 vota për, njihet për gjuhën e tij të vrazhdë kundrejt atyre që i konsideron kundërshtarë.
Në të paktën pesë postime gjatë muajit gushtit, ai e ka përdorur fjalën “langarecët” si një term ofendues që u referohet personave të pandershëm, që shfrytëzojnë të tjerët dhe nuk kanë integritet, duke kritikuar në këtë mënyrë opozitën, sistemin e drejtësisë, dhe mediat në Kosovë.
Ndërkaq Liburn Aliu është njëri nga themeluesit e Vetëvendosjes.
Së bashkë me Albin Kurtin e Glauk Konjufcën, ishin që nga organizata KAN, e cila më pas u kthye në Vetëvendosje.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
