Kosova do të shkojë në zgjedhje të parakohshme parlamentare pasi Kuvendi dështoi të zgjedhë presidentin e ri brenda afatit kushtetues.
Në një konferencë për shtyp, presidentja Vjosa Osmani njoftoi shpërndarjen e Parlamentit dhe shpalljen e zgjedhjeve të reja, duke akuzuar klasën politike për bllokimin institucional.
Osmani tha se afati kushtetues për zgjedhjen e presidentit skadoi në mesnatën e 5 marsit dhe se deputetët kishin pasur 23 ditë kohë për të përmbushur këtë detyrim.
Ky nuk ishte një dështim i rastësishëm, por një veprim i kalkuluar. Kam vendosur të shpërndaj Kuvendin dhe të shpall zgjedhjet e reja. Qytetarët nuk kanë dashur zgjedhje, këtë e ka krijuar dështimi i Kuvendit.
Presidentja theksoi se vendi është sjellë në këtë situatë nga “njerëz të papërgjegjshëm me qëllime të rrezikshme”, ndërsa shtoi se vendimi i saj synon të mbrojë rendin kushtetues.
Gjatë konferencës, Osmani komentoi edhe debatet për amendamentet kushtetuese që parashikojnë zgjedhjen e presidentit drejtpërdrejt nga populli.
Ajo sqaroi se edhe nëse amendamentet do të miratoheshin, ato nuk do të ndikonin në zgjedhjen e presidentit të ardhshëm të menjëhershëm dhe nuk lidhen me mundësinë e rikandidimit të saj.
Në fund, Osmani theksoi se qytetarët kanë nevojë për qartësi dhe institucione funksionale.
Jam e vetëdijshme që dekreti mund të kundërshtohet në Gjykatën Kushtetuese, por kurrë s’kam qenë më krenare sesa për këtë vendim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
