Ka mbetur edhe një ditë deri në përfundim të afatit kushtetues për zgjedhjen e presidentit të Kosovës.
Kosova duhet ta zgjedhë presidentin e ri deri më 5 mars, në të kundërt rrezikon të shkojë në zgjedhje të reja të parakohshme. Mandati i presidentes aktuale, Vjosa Osmani, përfundon në fillim të muajit prill.
Osmani synon edhe një mandat të dytë. Emri i saj ishte propozuar nga Albin Kurti dhe Lëvizja Vetëvendosje në vitin 2021, por aktualisht kjo parti nuk ka bërë publik ndonjë emër konkret për kandidat.
Pesë takime që Kurti ka zhvilluar me krerët e Partia Demokratike e Kosovës dhe Lidhja Demokratike e Kosovës nuk kanë prodhuar ende një zgjidhje të qartë: zgjedhjen e presidentit apo dërgimin e vendit në zgjedhje të reja.
Në prag të seancës për zgjedhjen e presidentit, Kurti pritet të zhvillojë edhe sot takime me liderët opozitarë, në përpjekje për të arritur një marrëveshje politike.
Ai do të takohet sërish me Bedri Hamzën dhe Lumir Abdixhikun për të diskutuar mundësinë e arritjes së një konsensusi.
Seanca e Kuvendit për zgjedhjen e presidentit mund të thirret gjatë ditës ose në mbrëmje.
Takimet e sotme konsiderohen vendimtare për të përcaktuar nëse vendi do të zgjedhë kreun e ri të shtetit apo do të përballet me një proces të ri zgjedhor.
Sipas Kushtetutës së Kosovës, në dy raundet e para për zgjedhjen e presidentit kërkohen 80 vota nga 120 deputetë, ndërsa në raundin e tretë mjaftojnë 61 vota.
Një kandidat duhet të sigurojë paraprakisht të paktën 30 nënshkrime të deputetëve për të hyrë në garë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
