Kryeministri në detyrë i Kosovës, Albin Kurti, ka reaguar pas njoftimit të Ambasadës së SHBA-së në Prishtinë për pezullimin e planifikimit të dialogut strategjik me Kosovën.
Gjatë mbledhjes së sotme të Qeverisë, Kurti u shpreh se Kosova nuk është prishur me SHBA-në, por ka disa dallime që, sipas tij, po keqinterpretohen nga opozita.
Nuk jemi prishur me Amerikën, por kemi disa dallime.
Ndonëse opozitarët po e stërmadhojnë në dritë negative çdo ndodhi për raportet tona me SHBA-në, unë nuk dua t’i minimizoj zhvillimet e fundit.
I siguroj qytetarët se qeveria i trajton seriozisht qëndrimet e Ambasadës Amerikane.
Kurti tha se gjatë mandatit të tij, Qeveria ka punuar për forcimin e marrëdhënieve me Shtetet e Bashkuara në tre fusha kyçe: diplomaci, mbrojtje dhe zhvillim.
Ai theksoi se komunikimi me Ambasadën Amerikane nuk është pezulluar, por bëhet fjalë vetëm për pezullimin e planifikimit të dialogut strategjik, jo të procesit në tërësi.
“Raportet SHBA-Kosovë janë më të mëdha se qeveritë tona dhe i tejkalojnë ato. Ato janë lidhje të thella mes dy popujve,” – shtoi ai.
Ambasada amerikane njoftoi më herët se Uashingtoni ka vendosur të pezullojë për një kohë të pacaktuar dialogun strategjik me Kosovën, duke e justifikuar vendimin me “veprime të qeverisë që kanë rritur tensionet dhe paqëndrueshmërinë, duke vështirësuar bashkëpunimin në prioritetet e përbashkëta.”
Ky pezullim vjen në një kohë të ngërçit institucional të zgjatur në Kuvendin e Kosovës. Që nga 15 prilli, kur nisën seancat për konstituimin e legjislaturës së re, Kuvendi nuk ka arritur të përfundojë formimin e plotë të strukturave, për shkak të moszgjedhjes së nënkryetarit nga komuniteti serb.
Përpjekjet për zgjedhjen e këtij posti kanë dështuar disa herë, përfshirë edhe kandidaturën e Nenad Rashiqit, i mbështetur nga Lëvizja Vetëvendosje, por jo nga partitë e tjera shqiptare.
Gjykata Kushtetuese ka vendosur një masë të përkohshme që bllokon funksionimin e plotë të Kuvendit, e vlefshme deri më 30 shtator.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
