Kanë kaluar një javë që nga momenti kur Komisioni Qendror i Zgjedhjeve i është drejtuar zyrtarisht Qeverisë së Kosovës për ndarjen e buxhetit për organizimin e zgjedhjeve të parakohshme parlamentare, por ekzekutivi i drejtuar nga Albin Kurti ende nuk ka dhënë përgjigje.
Më 26 nëntor, KQZ-ja i ka kërkuar qeverisë ndarjen e 11.5 milionë eurove për organizimin e zgjedhjeve të 28 dhjetorit. Megjithëse ka mbetur më pak se një muaj nga data e mbajtjes së tyre, kabineti qeveritar nuk ka dhënë asnjë shpjegim për vonesën.
Sipas mediave në Kosovë, kjo situatë rrezikon seriozisht organizimin e operacioneve të nevojshme zgjedhore dhe, si pasojë, mund të vihet në rrezik i gjithë procesi.
Dhjetëra aktivitete tenderuese që lidhen me organizimin e zgjedhjeve nuk mund të nisin pa siguruar më parë mjetet financiare.
Megjithëse KQZ-ja nuk ka ende buxhetin e kërkuar, institucioni pritet që gjatë ditës së sotme (e martë) të mbajë një mbledhje për të vendosur mbi rekomandimin për “zhvillimin e procedurave emergjente ekstreme” për aktivitetet e prokurimit që lidhen me zgjedhjet e parakohshme parlamentare të 28 dhjetorit 2025.
Procedura emergjente përfshin shtypjen e fletëvotimeve, materialet për votim jashtë Kosovës, shërbimet postare për votimin jashtë Kosovës, pakot e trajnimit, transporti i materialit zgjedhor, kabinat e votimit, vulat e zgjedhjeve, e shumë të tjera.
Në mbledhjen e KQZ-së të mbajtur më 25 nëntor është miratuar plani buxhetor për organizimin e zgjedhjeve të parakohshme për Kuvendin e Kosovës, që do të mbahen më 28 dhjetor 2025.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
