Lista Serbe nuk certifikohet nga KQZ/ Reagojnë ambasadat amerikane, gjermane dhe BE-ja në Kosovë

Komisioni Qendror i Zgjedhjeve refuzoi sërish të martën certifikimin e Listës Serbe për zgjedhjet e jashtëzakonshme parlamentare të 28 dhjetorit. 

Ky vendim ka shkaktuar reagime të ashpra nga Bashkimi Evropian, Ambasada e SHBA, ajo e Gjermanisë, Mbretëria e Bashkuar dhe Misioni i OSBE-së në Kosovë, të cilat janë shprehur të zhgënjyera dhe të indinjuara.

Sipas Zyrës së BE-së në Kosovë, politizimi i KQZ-së nga Lëvizja Vetëvendosje dhe partitë e tjera politike është i dëmshëm për një proces zgjedhor gjithëpërfshirës dhe në përputhje me standardet ndërkombëtare dhe rekomandimet e Misionit të Vëzhgimit të Zgjedhjeve të BE-së.

Edhe OSBE-ja ka reaguar, duke dënuar veprimet që minojnë të drejtën e subjekteve politike për të marrë pjesë në zgjedhje.

Ambasada e Shteteve të Bashkuara të Amerikës në Kosovë ka fajësuar Lëvizjen Vetëvendosje për bllokimin e certifikimit të Listës Serbe, duke i quajtur veprimet e saj përçarëse.

Nga ana tjetër, ambasadori gjerman në Kosovë, Rainer Rudolph, ka kritikuar refuzimin e anëtarëve të KQZ-së për certifikimin e Listës Serbe, duke theksuar se procesi zgjedhor duhet të jetë i lirë nga manovrimet politike të aktorëve partiakë.

Analistët politikë vlerësojnë se ky vendim, i cili sipas tyre nuk ka asnjë bazë ligjore, i shërben më së shumti narrativës së Serbisë se të drejtat e komunitetit serb po shkelen në Kosovë.

Derisa Lista Serbe mbetet jashtë garës, KQZ ka certifikuar 22 subjekte të tjera për zgjedhjet e 28 dhjetorit.

Kjo është hera e tretë që KQZ nuk e certifikon fillimisht Listën Serbe, pasi njësoj kishte vepruar edhe për zgjedhjet parlamentare të 9 shkurtit dhe zgjedhjet lokale të 12 tetorit. 

Në të dy rastet e mëparshme, PZAP e kishte rrëzuar vendimin e KQZ-së.

Rekomandimi për certifikimin e Listës Serbe, e cila gëzon mbështetjen e Beogradit, mori vetëm 2 vota pro, 2 kundër dhe 7 abstenime gjatë mbledhjes së të martës pasdite.