Në Gjykatën Themelore në Prishtinë është zhvilluar sot seanca gjyqësore ndaj drejtuesit të Organizatës së Veteranëve të Ushtrisë Çlirimtare të Kosovës, Faton Klinaku, dhe Nuredin Selmanit, të cilët akuzohen për kanosje me jetë ndaj kryeministrit në detyrë, Albin Kurti.
Në seancë ishte i pranishëm edhe vetë kryeministri Kurti, në cilësinë e të dëmtuarit.
Të dy të pandehurit, Klinaku dhe Selmani, u deklaruan të pafajshëm, duke mohuar akuzat. Klinaku u shpreh se, sipas tij, nuk ekziston vepër penale, ndaj nuk e pranon fajësinë.
Nga ana tjetër, Albin Kurti njoftoi se nuk ka angazhuar avokat dhe se do ta përfaqësojë vetë veten në këtë proces.
Ai shtoi gjithashtu se nuk do të paraqesë kërkesë pasurore-juridike, pra nuk kërkon dëmshpërblim.
Gjykatësi Rrahman Beqiri informoi palët se mbrojtësit e të akuzuarve kanë afat 30-ditor për të paraqitur kundërshtimet ndaj provave të paraqitura nga Prokuroria.
Sipas aktakuzës së Prokurorisë Themelore të Prishtinës, Klinaku dhe Selmani akuzohen për kanosje me jetë ndaj Kurtit, përmes postimeve në rrjetet sociale, të datës 30 gusht 2023.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
