Komisioni Qendror i Zgjedhjeve (KQZ) ka certifikuar sot rezultatet e zgjedhjeve të parakohshme parlamentare të 7 qershorit, rreth një muaj pas mbajtjes së tyre. Këto ishin zgjedhjet e treta parlamentare që Kosova organizoi në më pak se një vit e gjysmë.
Sipas rezultateve të certifikuara, Lëvizja Vetëvendosje (LVV) ka siguruar 53 mandate. Partia Demokratike e Kosovës (PDK) ka fituar 22 ulëse, Lidhja Demokratike e Kosovës (LDK) 18 mandate, ndërsa Aleanca për Ardhmërinë e Kosovës (AAK) shtatë mandate.
Pas certifikimit të rezultateve, ushtruesja e detyrës së presidentes dhe njëherazi kryeparlamentarja, Albulena Haxhiu, duhet të thërrasë seancën konstituive të Kuvendit.
Sipas Kushtetutës së Kosovës, kjo seancë duhet të mbahet brenda 30 ditëve nga certifikimi i rezultateve, megjithëse mund të thirret edhe më herët.
Në seancën konstituive bëhet betimi i deputetëve, zgjidhen kryetari dhe nënkryetarët e Kuvendit dhe më pas hapet rruga për formimin e Qeverisë së re.
Pas konstituimit të Kuvendit, presidentja në detyrë i jep mandatin për formimin e Qeverisë partisë fituese të zgjedhjeve, në këtë rast Lëvizjes Vetëvendosje.
Nga Zyra e Presidentes konfirmuan se seanca konstituive do të thirret brenda afateve të përcaktuara nga Kushtetuta.
Edhe pse nuk pritet që konstituimi i Kuvendit dhe formimi i Qeverisë të hasin në vështirësi, zgjedhja e presidentit të ri mbetet sfida kryesore politike.
Lëvizja Vetëvendosje ka siguruar 53 mandate në Kuvendin me 120 deputetë dhe, me mbështetjen e deputetëve të pakicave joserbe, pritet të sigurojë shumicën e nevojshme për krijimin e institucioneve të reja.
Megjithatë, zgjedhja e presidentit kërkon pjesëmarrjen e të paktën dy të tretave të deputetëve në seancën e votimit, çka e bën të domosdoshme arritjen e një marrëveshjeje politike mes forcave parlamentare.
Kushtetuta parashikon që presidenti i Kosovës duhet të zgjidhet brenda 60 ditëve nga konstituimi i Kuvendit. Nëse kjo nuk ndodh, Kuvendi shpërndahet automatikisht dhe vendi shkon në zgjedhje të reja.
Deri më tani, partitë politike nuk kanë zhvilluar negociata për një marrëveshje lidhur me zgjedhjen e presidentit të ri.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
