Ushtruesja e detyrës së presidentes së Kosovës, Albulena Haxhiu, ka caktuar datën 7 qershor për mbajtjen e zgjedhjeve të parakohshme parlamentare.
Sipas saj, ky vendim është marrë pas vlerësimit të afateve kushtetuese, nevojave organizative të Komisionit Qendror të Zgjedhjeve (KQZ) dhe rëndësisë së një pjesëmarrjeje sa më të gjerë të qytetarëve në procesin zgjedhor.
“Në këtë takim ishin të ftuara 17 parti politike, ndërsa të pranishme ishin 15. Pas shqyrtimit të propozimeve të partive dhe në përputhje me afatet ligjore dhe kushtetuese, kam vendosur që zgjedhjet e parakohshme për Kuvendin të mbahen më 7 qershor”, është shprehur Haxhiu.
Edhe përfaqësuesit e partive politike kanë dhënë dakordësinë për këtë datë, pas konsultimeve të zhvilluara me ushtruesen e detyrës së presidentes.
Kryetari i PDK-së, Bedri Hamza, deklaroi se 7 qershori ishte data më e kërkuar për mbajtjen e zgjedhjeve.
Ndërkohë, nënkryetarja e LDK-së, Jehona Lushaku-Sadriu, bëri të ditur se subjekti që përfaqëson mbështet këtë datë, në përputhje me kapacitetet organizative të institucioneve përgjegjëse.
Komisioni Qendror i Zgjedhjeve tashmë pritet të nisë përgatitjet për procesin zgjedhor në ditët në vijim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
