Vala e protestave dhe e bojkotit ka përfshirë tashmë edhe institucionet e arsimit të lartë në vend. Deputeti i Partisë Demokratike, Luçiano Boçi, ka bërë të ditur se studentët në Tiranë dhe në rrethe kanë braktisur masivisht auditorët, duke iu bashkuar protestës.
Sipas tij, përpjekjet e autoriteteve për të paraqitur një situatë normale dhe të qetë janë thjesht mashtrime, ndërsa ka denoncuar presionet e ushtruara mbi nxënësit dhe mësuesit.
Në MCN Live, Boçi ka theksuar se shkaqet e kësaj revolte tejkalojnë problemet e brendshme të arsimit, duke u fokusuar te kërkesa e panegociueshme për largimin e kryeministrit Rama.
Reagimi qytetar dhe revolta po vazhdon kudo me të njëjtën forcë, si në Tiranë ashtu edhe në qytetet e tjera të vendit. Konkretisht në Tiranë, ne kemi informacione të sigurta nga terreni se ka një bojkot të gjithanshëm dhe studentët janë larguar masivisht nga auditorët, prandaj kushdo që mundohet ta paraqesë situatën si të qetë apo normale, thjesht gënjen dhe mashtron opinionin publik.
Shkaqet e kësaj kryengritjeje janë të shumta dhe nuk lidhen më vetëm me premtimet e thyera apo paktin me universitetin, por ajo që kërkohet urgjentisht sot është dorëheqja e menjëhershme e Edi Ramës dhe krijimi i një qeverie teknike. Nuk ka asnjë lloj proporcionaliteti mes dhunës që ushtron policia dhe reagimit të protestuesve, dhe shkaktari i vetëm i këtij konflikti është Edi Rama, prandaj edhe kërkesa e qytetarëve është plotësisht e qartë.
Deklaratat që vijnë vazhdimisht nga kryeministri janë tërësisht të papranueshme, ndërkohë që nga ana tjetër është ushtruar një presion i jashtëzakonshëm administrativ ndaj nxënësve dhe mësuesve në shkolla që të mos guxojnë të ushtrojnë të drejtën e tyre legjitime për të protestuar.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
