Një nga arsyet kryesore të moszbatimit të ligjit të falimentit deri më sot ka qenë paaftësia paguese e subjekteve në falimentim, pra pamjaftueshmëria e masës së falimentit, që nuk mundësonte mbulimin e shpenzimeve të procedurës.
Deputeti socialist i Komisionit Parlamentar të Ekonomisë, dhe Financave, Ervin Bushati, në një postim në rrjtin social “facebook”, shkruan se ligji i vjetër ishte pengues për bizneset që falimentonin, pasi për shkak të proçedurave të tejzgjatura kërkonte vite të tëra për të përfituar statusin e falimentit, ndërkohë që detyrimet e papaguara të subjektit ndaj institucioneve shtetërore rriteshin, duke e bërë të papërballueshëm pagesën e borxhit për të, në kushtet kur nuk ka aftësi paguese prej vitesh.
Ky ligj, shprehet ai, parashikonte mbylljen ose mosfillimin e procedurës së falimentimit dhe çregjistrimin nga regjistri kombëtar i debitorit, i cili nuk kishte mjetet e mjaftueshme për të mbuluar kostot e procedurës së falimentimit. Kjo krijonte mundësi të mëdha për skema mashtrimi nëpërmjet falimentimit.
Deputeti Bushati deklaron se ligji i miratuar të enjten sjell ndryshime të rëndësishme në rregullimin e këtij procesi, bazuar në përvojën e BE-së dhe vendeve të rajonit.
“Ligji i ri parashikon ngritjen e Gjykatës së Falimentit, si një strukturë brenda Gjykatës së Rrethit, e cila do të ketë kompetenca të shtuara për të gjitha procedurat e falimentit, duke përfshirë edhe bllokimin e pasurisë së debitorit, por edhe përcaktimin e një administratori të përkohshëm për kompaninë debitore që është në proces falimenti”, deklaron ai.
Në këtë ligj, shprehet Bushati, shtohet roli i Prokurorisë, i Kontrollit të Lartë të Shtetit apo i autoriteteve mbikëqyrëse të sektorëve të ndryshëm me interes publik, që ato të jenë të mirëinformuara lidhur me procedurat e falimentimit dhe mos të mbetet vetëm në kuadrin e AMF-së, të Gjykatës së Falimentimit, të mbikëqyrësit, apo të kujdestarit, (siç ishte në ligjin e vjetër).
Në funksion të ligjit për falimentin, vijon deputeti Bushati, ishin dhe katër projektligje të tjera. Dy të parat, ndryshimet në Ligjin “Për shërbimin përmbarimor gjyqësor” dhe ato “Për shërbimin përmbarimor privat”, u miratuan respektivisht me 79 dhe 78 vota, ndërsa ndërhyrjet në Kodin Civil dhe Kodin e Procedurave Civile nuk u votuan për shkak të mungesës së votave.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
