Tola: Furrat e bukës në treg të lirë, kosto për qytetarët. Në vjeshtë, situatë e vështirë energjetike

Eksperti i ekonomisë Igli Tola në studion e MCN Live komentoi lidhur me mundësinë e rritjes së energjisë elektrike dhe daljen e furrave të bukës në treg të lirë ku u shpreh se kjo përkthehet në kosto për qytetarët. Ai tha se pritet rritja e çmimit të energjisë në të gjitha fashat e faturimit dhe se në vjeshtë parashikohet një situatë e vështirë. “Duke marrë indicie nga vendimmarrjet e ERE-s, është gati faliment dalja e furrave të bukës në treg të lirë. Zbatimi i kësaj do sillte një rëndim të kostove për qytetarët sepse do shkarkohet te produkti final dhe në situatën ku ndodhet sot vendi ynë do ishte diçka relativisht e rëndë për qytetarët. Nëse çmimi i energjisë do vijojë të jetë i lartë, një fenomen që zgjat në kohë patjetër që do kërkohet ndryshim në të gjitha fashat e faturimit. Kjo u paralajmërua dhe nga kryeministri disa muaj më parë sepse besoj situata e verës dhe prodhimi optimal për të mos dalë në treg për të blerë mund ta ketë shtyrë këtë si vendimmarrje, por në vjeshtë situata bëhet e vështirë dhe besoj se rritja e çmimit të energjisë do të jetë diçka e pashmangshme”.