Zgjatja e mundshme e konfliktit në Lindja e Mesme po ndiqet me shqetësim edhe nga konsumatorët shqiptarë, pasi pas shpërthimit të tij u vu re menjëherë rritja e çmimeve të naftës dhe të disa produkteve të tjera.
Ekspertët paralajmërojnë se ndikimi i një konflikti të zgjatur mund të reflektohet jo vetëm në çmime, por edhe në rritjen ekonomike globale, kreditimin dhe investimet.
Eksperti i financave Artur Ribaj u shpreh në emisionin ‘MCN Economy’ se efekti kryesor i përshkallëzimit të tensioneve, veçanërisht në lidhje me Iran, është rritja e çmimit të naftës, duke theksuar se kjo krizë ka më shumë karakter ekonomik sesa ushtarak.
Sipas tij, analizat janë fokusuar në dy skenarë: një konflikt afatgjatë dhe një konflikt afatshkurtër. Megjithatë, Ribaj thekson se skenari më negativ ka pak gjasa të realizohet.
Janë bërë disa analiza skenarësh, një është ai i luftës afatgjatë dhe tjetri i asaj afatshkurtër. Analizat tregojnë se skenari më i keq ka pak mundësi të ndodhë dhe pritet më shumë një konflikt afatshkurtër. Aktori kryesor i kësaj lufte që është Shtetet e Bashkuara të Amerikës ka një influencë të madhe përballë kundërshtarit që është Irani, ndaj kjo duket më shumë si një luftë ekonomike sesa ushtarake.
Ribaj theksoi se rritja e çmimit të naftës do të rrisë kostot e prodhimit, çka më pas përkthehet në rritje të çmimeve për konsumatorin dhe në shtim të inflacionit.
Rritja e kostove të prodhimit çon automatikisht në rritje çmimesh për konsumatorin, gjë që rrit inflacionin dhe mund të ndikojë në ngadalësimin ekonomik. Efektet e këtij konflikti janë globale dhe pritet një reduktim i rritjes ekonomike, duke sjellë edhe kufizim të investimeve dhe kreditimit.
Ai shtoi se rritja e çmimeve reflektohet menjëherë te konsumatori, por ulja e tyre shpesh nuk ndodh me të njëjtin ritëm, duke krijuar presion të vazhdueshëm mbi buxhetet familjare.
Kjo rritje çmimesh sjell rënie të konsumit, sepse varfëron xhepat e qytetarëve. Realiteti është aty, të gjithë e komentojnë, por askush nuk vepron. Nëse institucionet nuk kujdesen për mbrojtjen e konsumatorit, atëherë thjesht e lënë tregun të funksionojë pa përgjegjësi.Nëse duan të veprojnë institucionet gjithçka vlerësohet shumë lehtë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
