Komisioni për Politikën e Jashtme miratoi sot në mbledhjen virtuale të radhës tre projektligje:
Në drejtimin e kryetares, Mimi Kodheli, në cilësinë e komisionit parlamentar për dhënie mendimi, Komisioni shqyrtoi dhe miratoi marrëveshjen e huasë me BERZH-in për financimin e konektivitetit të rrugëve rajonale dhe lokale në Shqipëri, marrëveshjen e huasë shtesë me fondin e Kuvajtit për zhvillimin ekonomik arab për financimin e projektit të rehabilitimit të rrugës së lumit të Vlorës dhe protokollin 6 shtesë të marrëveshjes për amendimin dhe aderimin në marrëveshjen e tregtisë së lirë të Evropës Qendrore.
Të tri projektligjet u prezantuan për komisionin nga dy zëvendësministret e Ekonomisë dhe Financave, Vasilika Vjero dhe Belinda Ikonomi.
Për projektligjin “Për ratifikimin e marrëveshjes së huas, ndërmjet Republikës së Shqipërisë dhe Bankës Evropiane për Rindërtim dhe Zhvillim, për financimin e konektivitetit të rrugëve rajonale dhe lokale në Shqipëri”, Vjero qartësoi se financimi arrin shumën e 50 milionë dollarëve, e që gjithashtu, si projekt synon përmirësimin e infrastrukturës rrugore, krijimin dhe rritjen e zhvillimit ekonomik të zonave në bashkitë Vlorë, Lezhë, Shkodër, Librazhd dhe Peshkopi, si rezultat i përmirësimit të potencialit të tyre turistik dhe zhvillimit të mëtejshëm të bujqësisë.
Në lidhje me projektligjin “Për ratifikimin e marrëveshjes për një hua shtesë, ndërmjet Republikës së Shqipërisë dhe fondit të Kuvajtit për zhvillimin ekonomik arab për financimin e projektit të rehabilitimit të rrugës së lumit të Vlorës”, Vjero saktësoi se ratifikimi i kësaj marrëveshjeje i paraprin nisjes së punimeve, e që përfitues prej projektit do të jenë 175 mijë banorë duke realizuar plotësisht qëllimin për të cilin është iniciuar: lidhja e shumë fshatrave të lumit të Vlorës me bregdetin. Pas pyetjeve dhe diskutimeve u miratuan të dy projektligjet.
Belinda Ikonomi prezantoi për komisionin projektligjin “Për ratifikimin e protokollit 6 shtesë të marrëveshjes për amendimin dhe aderimin në marrëveshjen e tregtisë së lirë të Evropës Qendrore”. Ky protokoll, pas ratifikimit të tij nga vendet anëtare, do të jetë pjesë integrale e marrëveshjes CEFTA. Protokolli përmban dispozita të cilat mbështeten në angazhimet e marra në kuadër të Marrëveshjes së Përgjithshme të Tregtisë në Shërbime (GATS) në OBT, duke krijuar kushte të favorshme për zhvillimin dhe diversifikimin e tregtisë ndërmjet palëve dhe për nxitjen e bashkëpunimit tregtar dhe ekonomik në shërbime. Komisioni për Politikën e Jashtme, pas pyetjeve dhe diskutimeve, e miratoi edhe këtë projektligj.
Mbledhja e sotme e komisionit u zhvillua përmes platformës së komunikimit elektronik CISCO WEBEX.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
